2023 წლის 1 იანვრიდან შრომის უსაფრთხოების სფეროში ახალი ტექნიკური რეგლამენტი ამოქმედდება. სამუშაო სივრცეში უსაფრთხოების ან/და ჯანმრთელობის დაცვასთან დაკავშირებული ნიშნების განთავსების მინიმალური მოთხოვნები დამსაქმებლებს ავალდებულებს, სამუშაო სივრცეებსა და სამუშაო ადგილებზე განათავსონ უსაფრთხოების ან/და ჯანმრთელობის დაცვასთან დაკავშირებული ნიშნები და ინსტრუქტაჟების ჩატარების გზით მიაწოდონ ინფორმაცია დასაქმებულებს განთავსებული ნიშნების მნიშვნელობის შესახებ.

ტექნიკური რეგლამენტი მოიცავს 5 ტიპის ნიშანს და ადგენს როგორც ვიზუალური ნაწილის, ასევე, გამოყენების მიმართ წესებს.

ამკრძალავი ნიშანი - კრძალავს კონკრეტულ მოქმედებას

• წითელი ფერის
• მრგვალი ფორმის

 

 

გამაფრთხილებელი ნიშანი - მიუთითებს საფრთხის/საშიშროების შესახებ

• ყვითელი ფერის
• სამკუთხედი ფორმის

 

სავალდებულო ნიშანი - ადგენს კონკრეტული მოქმედების განხორციელების ვალდებულებას

• ლურჯი ფერის
• მრგვალი ფორმის

 

საევაკუაციო ან პირველადი სამედიცინო დახმარების ნიშანი - იძლევა ინფორმაციას საევაკუაციო გასასვლელების, პირველადი სამედიცინო დახმარების ან სამაშველო საშუალებების შესახებ

• მწვანე ფერის
• მართკუთხა ან კვადრატული ფორმის

 

საინფორმაციო ნიშანი - სხვა ნიშნები, რომლებიც იძლევა დამატებით ინფორმაციას. მაგალითად, ხანძარსაწინააღმდეგო ნიშნები

• წითელი ფერის
• მართკუთხა ან კვადრატული ფორმის

 

მაქსიმალური ეფექტურობის მიღწევის მიზნით, ნიშნები:

• უნდა იყოს მარტივად აღქმადი
• უნდა იყოს დამზადებული გამძლე მასალისაგან, მარტივად დაზიანების თავიდან ასაცილებლად
• უნდა განთავსდეს შესაბამის სიმაღლეზე და არ უნდა ფარავდეს სხვა ნიშანი ანდა ბარიერი
• უნდა განთავსდეს უშუალოდ ტერიტორიის შესასვლელთან/ობიექტთან/საფრთხის წყაროსთან
• არ უნდა განთავსდეს ერთდროულად ბევრი ნიშანი, რათა პიქტოგრამების სიმრავლემ არ გახადოს რთული მათი აღქმა